| By : Vidhya Soman ( Posted on :27 Mar, 2007 ) | Total Views : 1023 | Previous | Next |
Saalo baad na jaane kyon,
Zindagi se aankh milane ko
sapno ki shahnaiya bajane ko,
apne mann ki diwaro ko todne ko
aasmano ki boondo ka sithar bajte dekhne ko
Mere gaon ke rango mein lipti ek subah ko
meri raah takti unn galiyon ko dekhne ko
peeche chhuti meri yaado se milne ko
armaano ke panchhiyon ke saath udte dekhne ko
Toote khwabo ko fir se sanjone ko
beete lamho ki doliya uthane ko
aangan mein aaj aas ke diye jalane ko
dil ke kore kagaz par fir rang bharne ko
Apne kesh mein sansaar ko basaane ko
sansaar ke sankato ko apni jholi mein bharne ko
sabke aansuo ko haar banakar pahanne ko
sab kuch sehkar bhi shishu sa hasne ko
Inn sachche irado se jeene ko
inn kasmo vaado ko poora karne ko
kisi ka daaman khushiyon se bharne ko
meri sunhari dharti par sau janam lene ko
Na jaane kyon mera dil aaj kehta hai
Na jaane kyon aaj ji karta hai......
Written By : Vidhya Soman
