| Desh Hame Deta Hain Sab Kuchh |
| By : Naresh Lamba ( Posted on :03 Jun, 2009 ) | Total Views : 1081 | Previous | Next |
Desh hame deta hai sab kuchh
Hum bhi to kuchh dena sikhen
Suraj hame roshni deta
Hawa naya jiwan deti hai
Bhukh mitane ko hum sabki
Dharti par hoti kheti hai
oro ka bhi hit ho jisme
Hum aisa kuchh karna sikhen
Desh hame deta hai sab kuchh
Hum bhi to kuchh dena sikhen
Garmiyon ki tapti dopahar me
Ped sada dete hain chhaya
Suman, Sugandh sada deti hai
Hum sabko Phoolo ki mala
Tayagi taruno ke jiwan se
Hum aisa kuchh karna sikhen
Desh hame deta hai sab kuchh
Hum bhi to kuchh dena sikhen
Jo anpadh hai unhe padhaye
Jo chup hai unko vani de
Jo pichde hai unhe badhaye
Pyasi Dharti ko pani de
Hum mehnat ke deep jalakar
Naya ujala karna sikhen
Desh hame deta hai sab kuchh
Hum bhi to kuchh dena sikhen
Written By : Naresh Lamba
