| By : Vibha Handa ( Posted on :18 Jun, 2009 ) | Total Views : 417 | Previous | Next |
kab se dhoondh rahi hoon
main swayam apni pahchaan.
paas hoon swayam ke
per fir bhi
apne aap se
hoon main kitni anjaan
apne hi banaye
raaste per khojati hoon
(shayad) apne hi
pairon ke nishaan.
kuch pal -
rukati hoon,
dekhti hoon.
na jaane kise
fir chal padati hoon
hoker main pareshaan.
kabhi hansati hoon
kabhi roti hoon
kabhi ho jaati hoon
main swayam per hairaan.
jaise samajh
nahi paati hoon
main apni hi banayi
vidhi ka vidhaan
kisi anya ki
aankhon me
hriday me, mastishk mein
dhoondhati hoon apne
jeewan ka samvidhaan
is uljhe se
parivesh me
kahaan mil paayegi
mujhe meri apni pehchaan?
Written By : Vibha Handa
