Romantic shayari

baat chali teri aankhon se ja pahunchi paimane tak
kheench rahi hai teri ulfat aaj mujhe maikhane tak
ishq ki baatein gham ki baatein duniyawale karte hain
kisne shama ka dukh dekha hai, kaun gaya parwane tak
ishq nahin hai tum ko mujhse sirf bahane karti ho
yunhi bahane qayam rakhna tum mere mar jane tak
itna hi kehna hai tumse mumkin ho to aa jana
aa hi gaye to rukna hoga, aankhon ke pathrane tak

bazm-e-dushman mein bulate ho ye kya karte ho
aur phir aankh churate ho ye kya karte ho
baad mere koi mujh sa na milega tum ko
khaak mein kis ko milate ho ye kya karte ho
chinte paani ke na lo neend bhari aankhon par
sote fitne ko jagate ho ye kya karte ho
hum to dete nahin kya ye bhi zabardasti hai
chhiin kar dil liye jaate ho ye kya karte ho
ho na jaaye kahin daaman ka churana mushkil
mujh ko deewana banate ho ye kya karte ho

Aakar ke jaane ki baat karte ho
phir dil dukhane ki baat karte ho
Phir btate ho apni majboori
phir bahaane ki batt karte ho
Ekta, ittefaq, pyaar-o-guroor
kis zamane ki baat karte ho
Dil ki duniya ujaad di pehle
ab basaane ki baat karte ho
Main mohabbat ka zikr karti hu
tum zamane ki baat karte ho

kehte hain mujhse ishq ka afsana chahiye
rusvai ho gai tumhein sharmana chahiye
Khuddar itni fitrat-e-rindaan na chahiye
saaqi ye khud kahe tujhe paimana chahiye
aashiq bagair husn-o-jawani fizuul hai
jab shamma jal rahi hai to parwana chahiye
aankhon mein dam ruka hai kisi ke liye zaroor
varna mariize hijr ko mar jana chahiye
vaada tha unka raat ko aane ka ae huzoor
ab chaand chhup gaya unhen aa jana chahiye

azeez itna hi rakho ke ji sambhal jaye
ab is qadar bhi na chaho ke dam nikal jaye
mile hain yuun to bahut aao ab milen yuun bhi
ke ruuh garmi-e-anfaas se pighal jaye
mohabbaton mein ajab hai dilon ko dhadka sa
ke jaane kaun kahaan raasta badal jaye
main wo chiragh-e-sar-e-rehguzar-e-duniya huun
jo apni zaat ki tanhaaiyon mein jal jaye
har ek lehja yahi arzoo yahi hasrat
jo aag dil mein hai wo sher mein bhi dhal jaye