| By : Shyama ( Posted on :28 Jun, 2010 ) | Total Views : 5745 | Previous | Next |
Ek bhakt ne bhagwaan ko jeevan bhar pukara. Use bada naaz tha ki Prbhu aayenge. Usne sabhee se kah bhee rakha tha ki dekhna ek din mere Shyam mere paas jaroor aayenge. Poora jeevan uska isi intazaar mein beet gaya kintu Bhagawaan nahi aaye. Ant mein wo mrityu shayya par tha,sab uska majaak bana rahe the ki "kahata tha Bhagwaan aayenge, kahaan hain tere Bhagawaan, tere Shyam?...." Bhakt ko bada dukh hua ki main to marne wala hoon par mere marne ke baad Shyam badnaam ho jaayenge, koi Prabhu ka naam bhee nahi lega.
Usne jhooth hi sabse kah diya ki "aaha! Prbhu tum aa gaye, mujhe maaloom tha tum aaoge....". Sabko laga vastav mein Prabhu aa gaye.Bhakt ko bhee tasallee hui ki ab Prbhu ka naam badnaam nahi hoga, mera kya hai, mujhe to yon bhee mitana tha...
Ab wo tasalli se mar sakata tha, nishchint tha. Tabhee Shyam prakat hue, unki aankhein bhari hui thee, bole "antim samay mein mujhpar vishwaas nahi rakh saka. Are jab maine kabhee tere jeevan ko badnaam nahi hone diya to kya teri mrityu ko hone deta? Jeevan bhar jisne teri laaj rakhi wo kya ant ke samay nahi rakhata?" Bhakt ke paas kahane ko kuch nahi bacha tha, uski aankhon se aviral ashru-dhaar bah chali.
Written By : Shyama
